Brussels and the Belgian Presidency of the Council of the European Union (mt)

Brussell u l-Presidenza Belġjana tal-Kunsill tal-Unjoni Ewropea

Il-Belġju ilu bil-Presidenza tal-Kunsill tal-Unjoni Ewropea mill-1 ta’ Lulju 2010. Għaldaqstant għandu rwol importanti fl-organizzazzjoni u fil-promozzjoni tal-attivitajiet Ewropej. Aktar minn qabel, din il-presidenza Belġjana qed tqiegħed lill-Belġju fil-qalba tal-Ewropa.

B’mod konkret, il-Presidenza Belġjana torganizza u tmexxi l-laqgħat tal-Kunsill tal-Unjoni Ewropea. Tfittex ukoll li ssib soluzzjonijiet u tilħaq ftehim bejn l-Istati Membri u ma’ istituzzjonijiet oħra tal-UE. Fl-aħħar nett, il-Presidenza Belġjana tirrappreżenta l-UE fl-oqsma tal-politika barranija u tal-politika tas-sigurtà.

Nilqgħuk fis-sit tal-Belt ta’ Brussell

Is-sit elettroniku tal-Belt ta’ Brussell jgħinek tiskopri aktar fuq il-Belt Kapitali tal-Ewropa. Brussell jirrappreżenta aktar minn 1,000 sena ta’ kultura, storja u wirt.

Permezz ta’ dan is-sit, il-Belt ta’ Brussell qed toffri tagħrif u ritratti fuqha għall-viżitaturi tagħha. Hemm ukoll kamera li turik b’mod dirett, matul il-jum u matul il-lejl, il-Pjazza l-Kbira ta’ Brussell – post iddikjarat bħala wirt dinji mill-UNESCO. Kamera oħra toffri l-veduti uniċi ta’ Place de Brouckère, filwaqt li hemm kamera oħra mal-Atomium, li toffri veduti panoramiċi ta’ Heysel plateau, u tal-Istadium Roi Baudouin.

Is-sit jinkludi wkoll żjarat virtwali li jgħinu lill-viżitaturi jduru dawra mal-aktar postijiet turistiċi magħrufa ta’ Brussell bħat-Town Hall, l-Atomium, il-Petite Rue des Bouchers f’Ilot Sacré, il-bini tal-Kummissjoni Ewropea, il-pjazez u l-galleriji kif ukoll il-Katidral ta’ San Mikiel Arkanġlu u Santa Gudula.

It-turisti u l-viżitaturi l-ġodda

Dan is-sit joffri tagħrif speċjali għat-turisti, inkluż għat-turisti tan-negozju (bħall-parteċipanti tal-kungressi, tal-fieri u tal-wirjiet tal-kummerċ). Dawn it-turisti jsiru jafu fuq kif jaslu Brussell (sal-ajruport, bil-ferrovija) u fuq kif jistgħu jduru fil-Belt bit-trasport pubbliku. Mis-sit, permezz tas-servizzi ta’ informazzjoni għat-turisti, wieħed jista’ jsib id-dettalji kollha tal-kuntatt (għal pariri u mapep tal-Belt), kif ukoll tagħrif jew ħoloq għal paġni fuq l-akkomodazzjoni fi Brussell (lukandi, b’mod speċjali għaż-żgħażagħ), attrazzjonijiet għat-turisiti (bħall-istatwa tal-funtana Manneken-Pis, li hi waħda mis-simboli ta’ Brussell), mużewijiet fi Brussell, bħall-Musées de la Ville (Mużewijiet tal-Belt), il-Musée Magritte u ċ-Ċentru tal-komiks - il-Belgian Comic Strip Centre.

Hemm ukoll fuljetti turistiċi fuq il-wirt u l-istorja tal-Belt. Dawn tista’ tniżżilhom jew tarahom mis-sit stess.

It-taqsima għat-turisti l-ġodda hi maħsuba biex tħaffef l-esperjenza ta’ dawn in-nies fi Brussell. Din it-taqsima toffri wkoll tagħrif fuq id-dispożizzjonijiet regolatorji (l-iffirmar tar-reġistru tal-popolazzjoni) kif ukoll servizzi aċċessibbli għar-residenti l-ġodda jew tal-futur ta’ Brussell (tiftix għal akkomodazzjoni, crèches, skejjel, reġistrazzjoni għal diversi servizzi, u oħrajn).

Attivitajiet fl-aġenda ta’ Brussell

Fi Brussell jittellgħu ħafna attivitajiet. Is-sit tal-Belt joffri tagħrif fuq dawn l-attivitajiet pubbliċi, kulturali, sportivi jew ta’ divertiment li jkunu se jsiru, kif ukoll fuq l-avvenimenti ta’ skala kbira li jittellgħu.

L-aġenda li hemm (li toffri l-possibbiltà tat-tiftix) tagħmilha possibbli li wieħed jagħżel l-avveniment jew il-preżentazzjoni li jkun jixtieq mill-ħafna li hemm, b’mod speċjali minn fost dawk li se jsiru fit-tieni nofs tal-2010. Dawn jinkludu l-Ommegang Royal Pageant (rikostruzzjoni tal-purċissjoni tal-Imperatur Charles V u divertiment storiku ieħor), it-Tour de France, il-Bruxelles les Bains (attività mtellgħa minn ċentru ta’ btala fil-Belt, b’attrazzjonijiet bl-ilma), il-Foire du Midi, il-Festival tas-sajf ta’ Brussell, it-Tapit tal-Fjuri tal-Pjazza l-Kbira, il-Lejl Imdawwal (lejl kollu divertiment), il-Maratona ta’ Brussell, il-Plaisirs d'Hiver (divertiment tax-xitwa) u s-suq tal-Milied, fost oħrajn.

Is-sit elettroniku tal-Belt ta’ Brussell hu aċċessibbli bi 3 lingwi: bil-Franċiż, bl-Olandiż u bl-Ingliż.